بتفكر تسافر لمرسى مطروح ❤️
النهارده هنتكلم باستفاضه عن مطروح .. مرسى مطروح من الاماكن الجميله جدا ده لو عايز تستمع بالبحر الصافى والرمله النقيه ..
وهناك هتقضوا وقت جميل بالنهار علي البحر وبليل تخرجوا وتستمعوا بركوب العجل و التسوق في شوارعها
في الأول كده علشان نبقى على نور
مطروح مش بتاعت يوم صد رد اقل حاجه تروح تقعدلك 5 ايام
ساعات السفر :
تقريبا من القاهره بالكتير 6 ساعات ومن الاسكندريه 3 ساعات
الحجز :
مطروح من الاماكن اللى ممكن تروحها من غير ماتحجز لان اغلبها نظام شقق سكنيه مش فنادق بس .. الفنادق عددها قليل وفى الاغلب سعرها عالى من الشقق ممكن يكون الضعف تقريبا .. لو عايز تحجز فندق عليك بمواقع الحجز زى BOOKING و TRIVAGO انما لو قررت تروح من غير ماتحجز ماتقلقشى اول ماتوصل مع اول سواق تاكسى هتقابله ممكن يدلك على شقق كتير لان معظم سواقين التاكسى هناك سماسره او تنزل وسط البلد او اى مكان عايز تقعد فيه وهتلاقى سماسره كتير جدا
افضل وقت تروح فيه هو شهر 7 او شهر 8 بلاش قبل كده او بعد كدا لان البلد جوها جميل ولو روحت فى شهور تانيه مش هتستمع بالبحر لان الجو هيكون ساقع شوية
واسعار الفنادق لو هتقعد فى حاجه فوق 3 نجوم يبقى الاوضه الزوجى هتكون فى حدود 1500-2000 جنيه
وفيه فنادق اقل من 3نجوم بتكون اسعار الاوضه فيها من 700-1000 جنيه
الشقق بقه على حسب مكانها يعنى لو صف اول على البحر من 700 – 1200 جنيه ولو صف تانى يبقى من 500-700 وممكن تاخد حاجه ابعد من اول 300 جنيه ... ميزه الشقه بقه انها بتبقى اوض كتير يعنى ممكن تاخد اسره من 5-6 افراد
افضل مكان تقعد فيها منطقه هناك ممتازه اسمها "العوام " وفيها كل حاجه
ميزه مطروح ان كل شط فيه مميزات والشواطىء هناك كتير ولازم كل يوم تروحلك شاطى جديد عشان تبقى شوفت كله
بالترتيب كده ," شاطى الابيض " احسن شاطىء بس مشكلته ان بعيد عن وسط البلد بس انقى مايه ورمله ويجى بعديها شاطى " عجيبه "
ولو انت مش بتاع موج ومعاك اطفال يبقى عليك بشاطى " الليدو" او " مطروح العام " او "النخيل
اشهر شواطئ مطروح روميل وعجيبة والابيض و كيلوباترا والجونة وبلو بيتش والبوسيت وشط الغرام و الرميلة مينا حشيش .
الشواطئ الكويسه للاطفال روميل و البسنت المياه مفيش فيها امواج و واطيه .
الشواطئ العامه زي الليدو و مطروح العام و روميل مش هقول وحشه بس هتلاقي فيها شوية زباله ومش صافيه اوي الي هيا .
لازم تروح عجيبه لازم عجيبه ما هو انتا هتروح عجيبه يعني هتروح عجيبه
اعمل حسابك في ميزانيه مخصصه للكراسي و الشمسيات الاسعار مش هتبقي ثابتة طبعاً ده مش رسمي ده استغلال من الناس لكن كل شط ليه رسوم ثابتة والمفروض انها بتبقي متعلقة في الشط بس طبعاً بتختفي 😅 بس طبعاً انت برده ممكن تشتكي لو حسيت ان الاسعار مبالغ فيها.
وبالنسبة للأكلات اللي على اد الايد
في محل نضيف وقريب من البحر هو في وش محل قرية كمونة للمشويات
اسمه عزت ..بيعمل سندوتشات بطريقة البقالة الاسكندراني..عيش فينو رفيع..جبنة و سجق و كبدة و بيض بسطرمة..مربي بكريمة..حلاوة..عسل.
اي سندوتش ب ٤ جنيه جبت سجق و كان حلو وتتبيلته جميلة واللي جامد هناك سندوتش بيض بالسجق
يعني تاخد ٦ سندوتشات بـ ٢٤ جنيه وبيبقى الرغيف الواحد نصين
عاوز تأكل سمك عليك و علي ( اسماك مجدي ) مكانه في شارع متفرع من شارع الاسكندريه ناس علي وضعها السمك بتاعهم علي وضعه البلطي شديد مشكلتهم التأخير و الزحمه يعني هات معاك كرسي و اعمل حسابك ان الأكل بيتأخر شوية بس هتأكل سمك تحلف بيه طول حياتك..
وعندك برضه اسماك ابوشعفة عند المحكمة القديمة و حمو التمساح عند بنك مصر
عاوز تأكل مشاوي عندك كمنه و عبده كفته ,مشوياتهم حلوه و خاصه كمنه
وكمان في ابو سلطان اكل بدوي بقي من الاخر وقعده عرب علي الارض وجو لذيذ
عاوز حلو ؟ عندك هريسة احمد حسنين بيعمل هريسه بالبندق اصلي و قدامه الدمياطي هات منه بلح الشام حلو و خطير
وطبعاً مينفعش تبقي في مطروح بلد اللب و متجبش لب ابيض من عند النصر الي في علم الروم , بس خد بالك علشان هتلاقي عشرمين محمصه باسم النصر , فاسأل علي محمصه النصر المسيحيه هتلاقي عليها امم حتي لو الوقت الساعه 4 الفجر ( انه حقا لب فاجر ) .
مطروح الصبح حاجه و بليل حاجه تانيه خالص
الكورنيش حلو .. اضرب ترمس و اقعد عـ البحر
وكمان الكافيهات حلوه في مطروح و كتير و القعده حلوه في الهواء و هتلاقي الكافيه الي علي قد الايد
بتحب البلاي ستيشن ؟ في مطروح هتلاقي بلاي ستيشن و قعدات عرب من الاخر حاجه قمه المتعه .
حضرتك لو انا عريس وعايز فندم اقعد فيه شهر يعني بس فندق يكون نضيف وكدا اي المطلوب ولا اي
ردحذففندق الفرسان و سانت ماري و ديلمار و عروس البحر انا برشحلك واحد من دول
حذفتسلم ايدك على المقال
ردحذفشوقتنى لزيارة مطروح